Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез.
Без бүгенге тапшыруны Казан шәһәре Азино бистәсендәге “Курай” татар балалар бакчасыннан әзерләдек. Безнең халыкта: “Май чүлмәге тышыннан билгеле” дигән мәкаль бар. Бу бакчага килеп керүгә үзенчә милли мохиткә чумасың. Сине ишек төбеннән каршы алган сыер һәм атка да түбәтәй һәм калфак кидертеп куйган алар. Чисталык һәм пөхтәлек турында инде әйткән дә юк. Җәй күзләрне камыштырып торган чәчәкләре әле соң көзгә кадәр үз матурлыкларын саклап торалар. Бакча эче иркен, җылы һәм якты. Монда эшләүче тәрбиячеләр үзләре дә шундый ук киң күңелле, бала җанлы дип уйларга тулы хакыбыз бар. Шундый тәрбиячеләрнең берсе – Мөбарәкҗанова Алсу Габделхәй кызы. Биредә инде 10 елдан артык татар теле дәресләрен алып бара.
