«Күрше хакы». Ошторма-Юмья авылыннан Ивановлар гаиләсе.
Игътибарыгызга “Күрше хакы” тапшыруының чираттагы чыгарылышын тәкъдим итәбез. Без аны ТР Рәисе каршындагы татар телен һәм Татарстанда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән әзерлибез.
Хөрмәтле радиотыңлаучылар, без сезне күпмилләтле республикабызда күрше хакын хаклап, дус-тату, бердәм яшәүче милләтләрнең мәдәнияте, гореф-гадәтләре белән таныштыруыбызны дәвам иттерәбез. Күрше хакын хаклап дип әйтүебез юкка түгел, чөнки алар үз телләреннән тыш, бик күп татар кешеләрен дә көнләштерерлек дәрәҗәдә татар телен дә белә, аны көндәлек тормышта кулланып гомер итәләр.
Тапшыруыбызның бүгенге каһарманнары – Люба апа һәм Владимир абый Ивановлар республикабызның күпмилләтле төбәге – Кукмара районы Ошторма-Юмья авылында 50 ел бергә гомер итәләр. Алар райондагы үрнәк гаиләләрнең берсе. Керәшен кызы Люба апа тумышы белән күрше авылдан булса, Владимир абый — Ошторма-Юмья авылыннан. Бу авылда элек-электән керәшен татарлары, удмуртлар, руслар бергә тату яшиләр. Бүген дә шулай дәвам итә.
