«Күрше хакы». Йомгаклау чыгарылышы.
Тапшыруыбызны сөенечле хәбәрдән башлыйбыз. Безнең зур җиңүебез бар! “Многоликая Россия” Бөтенроссия журналистлар конкурсында катнашып, “Күрше хакы” тапшыруы зур җиңүгә лаек булды. “Иң яхшы радиотапшылар циклы” номинациясендә икенче урын безнеке!
Тапшыруыбызны юкка гына “Күрше хакы” дип атамадык, чөнки элек-электән безнең халыкта: “Күрше хакы – тәңре, ходай хакы дигән гыйбарә яшәп килә. Бу уңайдан тормыш итә-итә расланган бер хакыйкать искә төшә: бер-береңнең телен белү – дус-тату яшәүгә юл ача. Үз күршеңнең телен, гореф-гадәтләрен белү – иң зур хөрмәт билгесе дип саныйбыз. Моны безнең “Күрше хакы” тапшыруы каһарманнары тагын бер кат раслады.
Әйе, бер яктан сөенечле булса, икенче яктан моңсу да, чөнки бүген без “Күрше хакы” тапшыруы белән хушлашабыз. Игътибарыгызга аның йомгаклау чыгарылышын тәкъдим итәбез. Исегезгә төшерәбез, без бу тапшыруны ТР Рәисе каршындагы татар телен һәм ТРда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән әзерләдек. Ел дәвамында без сезне республикабызда күрше хакын хаклап яшәгән, үз туган телләреннән тыш күршесенең телен, гореф-гадәтләрен белгән, хөрмәтләп яшәүче төрле милләт вәкилләре, кызыклы шәхесләр белән таныштырдык. Бүген без әлеге эшебезгә йомгак ясап, тапшыру геройларын кабат бергә җыярга булдык.
