Хөрмәтле татарстанлылар!
Сезне ихлас күңелдән Татарстан Республикасы Дәүләт флагы көне белән котлыйм.
Дәүләт флагы рәсми символ гына түгел, шуңа күрә бу көн бәйрәм даталары арасында аерым урын били. Өч дистә елдан артык безнең флаг герб һәм гимн белән бергә республиканың мәдәни байлыгын гәүдәләндерә, милләтара туганлыкны ныгыта.
Татарстан әләменең төсләре җәмгыятебезнең тормышчан принципларын чагылдыра: яшел – яшәү көче һәм яңарыш; ак – ниятләр сафлыгы, тынычлык һәм татулык; кызыл – җитлегү һәм бөек Россия язмышына нык бәйләнгән туган җиребезнең көч-куәте төсе. Барысы бергә алар – бердәмлегебезнең һәм ныклы адымнар белән алга баруыбызның символы.
Кадерле Татарстан халкы!
Бүген республика эзлекле үсешен дәвам итә һәм икътисад, фән, мәдәният һәм спортта югары нәтиҗәләргә ирешә. Масштаблы социаль проектларны гамәлгә ашыра, халыкара багланышлар булдыра һәм Ватаныбызның байлыгын арттыруга һәм куәтен ныгытуга саллы өлеш кертә.
Хәзерге көндә әләмебез тирән мәгънәгә ия, бүген без аны чын каһарманнар – махсус хәрби операциядә катнашучылар кулында күрәбез. Алар өчен газиз Татарстаныбызның әләме – намус һәм батырлык белән саклый торган Ватанның аерылгысыз өлеше, сынмас-сыгылмас ихтыяр көче, кыюлык, туган йортка чиксез мәхәббәт һәм тугрылык чагылышы. Без ышанабыз, байрагыбыз безнең сугышчыларны саклар һәм җиңүгә алып барыр!
Сезгә сәламәтлек, иминлек, республикабыз һәм илебез хакына нәтиҗәле хезмәтегездә уңышлар телим. Татарстан Республикасы Дәүләт флагы алга таба да игелекле гамәлләргә рухландырсын, тынычлыкка, гаделлеккә һәм үсешкә омтылуда берләштерсен, киләсе буыннарның ышанычлы киләчәге нигезе булсын. Бәйрәм белән!
