Муса Җәлил шигырьләренә җырлар.
Хәерле сәгатьтә дип, яңа хезмәт атнасын башлап җибәрәбез. Бер үк вакытта тагын бер зур эшкә старт бирелә — “Татарстан радиосы дулкыннарында каһарман шагыйрь Муса Җәлил атналыгы” башланып китә.
Хәзер без аны “Музыкаль мизгелләр” сәхифәсе белән ачып җибәрәбез һәм әлеге атналык 15 февральдә – Муса Җәлилнең тууына төгәл 120 ел тулган көнне Туфан Миңнуллинның “Моңлы бер җыр” әсәре буенча куелган радиоспектакль белән йомгакланачак.
Шулай ук атналык дәвамында сезнең игътибарга шагыйрьнең “Хат ташучы” поэмасы буенча эшләнгән радиокомпозиция, Шәйхи Маннурның “Муса” романыннан өзекләр, “Татарлар елмаеп үлделәр” дип исемләнгән әдәби-музыкаль композиция тәкъдим ителә. Концертларда атна буе Җәлил шигырьләре һәм аларга иҗат ителгән җырлар яңгырый. Мирсәет Яруллинның “Сандугач һәм чишмә” симфоник поэмасы, Нәҗип Җиһановның “Җәлил” операсыннан фрагментлар концерты да сезнең күңелгә хуш килер, дип уйлыйбыз.
Димәк, башлыйбыз! Татар халкының каһарман улы, Советлар Союзы Герое, СССРның Ленин премиясе лауреаты Муса Җәлилнең тууына 120 ел тулуга багышланган атналык! Һәм аны, әйткәнебезчә, шагыйрьнең шигырьләренә язылган җырлардан төзелгән концерт белән ачып җибәрәбез.
