«Тукай — истәлекләрдә». Татарстан радиосы фондыннан
Г.Тукай турында истәлекләр.
Бүгенге тапшыруыбыз Татарстан радиосы фондында Габдулла Тукайга кагылышлы язмалар турында булыр. Алар нинди халәттә, нинди сыйфатта саклана? Һәм алар эфирда ни дәрәҗәдә кулланыла? Күрәсез, бу тапшыру Тукайның туган көнендә Татарстан радиосының үз тыңлаучылары алдында үзенә күрә бер хисап тотуы кебегрәк булачак. Бернинди шикләнүләргә урын калдырмыйча баштан ук шуны әйтеп куйыйк: Тукай исеме белән бәйле һәрбер язма күз карасыдай кадерләп саклана бездә. Фондыбыздагы берничә киштәне репортажлар биләп тора. Болар һәр елны шагыйрьнең туган көнендә үткәрелә торган Шигырь бәйрәмнәреннән, юбилей тантаналарыннан Тукайның Казандагы әдәби музеенда, Тукай клубында, Кырлайда, Кушлавычта, уку йортларында мәдәният-сәнгать оешмаларында үткәрелгән чаралардан алынган язмалар. Аларда кемнәр генә катнашмаган да, кемнәр генә Тукайга кагылышлы фикерләрен әйтмәгән. Тагын бер зур бүлектә — сөекле шагыйребезнең әсәрләре тупланган. Биредә күренекле артистлар укуында аның шигырьләре, публицистик чыгышлары урын алган. Өченче юнәлеш — Тукай турындагы әдәби һәм документаль әсәрләр.
Татарстан радиосы фондында аерым бер саклык белән саклана торган тагын бер төр язмалар бар — болар Тукай турында истәлекләр. Шагыйрьне үз күзләре белән күргән, хәтта аның белән аралашкан шәхесләрнең хатирәләре. Без хәзер менә шушы язмаларга тукталырбыз. Аларны тыңлаганда шагыйрь гади җир кешесе, фани дөнья кешесе буларак күз алдына килеп баса. Һәм аның иҗатының зурлыгы тагын да ачыграк аңлашыла башлый кебек. 1966 елда магнитофон тасмасына язып алынган тавышлардан башлыйк. Бу елны Г.Тукайның тууына 80 ел тулу билгеләп үтелгән була. Күренекле актер Касыйм Шамил, мәгърифәтче Шиһап Әхмәров, журналист Исмәгыйль Рәмиев, актрисалар Сәхибҗамал Гыйззәтуллина-Волжская, Гөлсем Болгарская истәлекләрен ишетерсез. Тапшыруыбызның икенче өлешендә Хәким Сәлимҗанов язмасында Габдулла Тукайның «Печән базары яки яхүд Яңа Кисекбаш» әсәрен ишетә алоасыз.
