Буада яшәүче Рамил Әбделманов күптән түгел сыерлау асрау буенча крестьян-фермер хуҗалыгы оештырды. Аңа бу эштә һөнәре буенча ветеринария табибы булган игезәк туганы Раил булыша. Бүгенге көнгә башлаучы фермерлар сыер абзары төзеп куйдылар, сыерларның бер өлешен сатып алдылар һәм эшчәнлекне башладылар. Аларның хезмәт процессын хәбәрчебез күзәтте.
Элек Казанда яшәгән Рамил Әбделамнов фермер хуҗалыгы оештыруга грантны моннан ел ярым элек алды. Туган шәһәренә кайтуга яшь кеше фермер булу турында хыялланды. Аның теләген гаиләсе дә хуплады. Шулай эш башланды. Дәүләттән бирелгән акча средстволарына 50 башка исәпләнгән җитмешкә 18 метр зурлыгында сыер абзары төзеп куйдылар. Бүген анда 20 баш терлек асрала.
Терлекләрне ашату рационын туганнар үзләре төзи. Монда инде Раилнең ветеринария белеме һәм моңа кадәр эәләгән тәҗрибәсе ярап куйды. Әлегә фермерларның үз җирләре юк. Азыкны тулысынча сатып алырга туры килә.
Фермер хуҗалыгының үз таркторы Уаз автомобиле, азык склады бар. Транспортир көйләнгән. Булачак үрчем өчен җылы урын хәстәрлиләр. Яңа туган бозауларны үзләрендә калдырырга планлаштыралар. Бүген фермада көн саен уртача 50 литр сөт савып алалар. Аны дәүләткә тапшыралар. Аннан килгән акча ферма ихтыяҗына кереп бара. Егетләр белә авырлыклар әле булачак, чыгымнар да. Әле керем ала башлаганчы да берничә ел кирәк булачак. Әмма алар бирешергә уйламый.
Рөстәм Әхмәдуллин, Илнур Кадыйров.
