Иртәнге чыгарылыш
Җиденче чакырылыш Дәүләт Советының алтынчы утырышында Парламент эшенә нәтиҗәләр ясалды.
Казан Кремлендә Яңа ел алдыннан традицион рәвештә дәүләт бүләкләрен тапшыру тантанасы узды.
Татарстан Рәисе Рөстәм Миңнеханов журналистлар белән очрашты.
Яңа ел каршылауга бәйле яллар бу юлы 11 көн дәвам итәчәк.
Көндезге чыгарылыш
Татарстан Рәисе Рөстәм Миңнеханов «Татнефтехиминвест-холдинг» акционерлык җәмгыяте директорлар советы утырышында Россия Фәннәр академиясе хакыйкый әгъзасы Валентин Ананиковны бүләкләде. Академиянең органик химия институты лабораториясе мөдире, химия фәннәре докторы, профессор Валентин Ананиковка Владимир Марковников исемендәге Халыкара премия тапшырылды.
Татарстанда 2024 елгы автомобиль һәм мотоспорт сезонына йомгак ясалды. Чарада Татарстан Рәисе Рөстәм Миңнеханов, республика автоспорт федерациясе президенты Иван Егоров, «КамАЗ-мастер» узыш командасы спортчылары, автоспорт ветераннары катнашты.
Дәүләт Думасы депутаты, Думаның гаиләне яклау, ата-аналар һәм балалар мәсьәләләре комитеты әгъзасы Татьяна Ларионова республикада балалы гаиләләргә, шул исәптән күп балалы гаиләләргә, студентлар гаиләләренә һәм махсус хәрби операциядә катнашучылар гаиләләренә ярдәм итү юнәлешендә күп эшләнүен билгеләп үтте.
Кичке чыгарылыш
25 декабрьдә “Татнефть Арена» боз спорт сараенда Республика Яңа ел чыршысы бәйрәме була. Чараның программасына ике тамаша кертелгән, алар сәгать көндезге уникедә һәм дүрттә башлана. Тамашаларда махсус хәрби операциядә катнашучыларның гаиләләрендә тәрбияләнүче балалар, олимпиадаларда, конкурсларда җиңүчеләр, шулай ук балалар йортларында һәм интернат мәктәпләрендә тәрбияләнүчеләр катнашачак.
Татарстан Премьер-министры урынбасары — Авыл хуҗалыгы һәм азык-төлек министры Марат Җаббаров «Теләкләр чыршысы» Бөтенроссия хәйрия акциясендә катнашты. Ул Кукмара һәм Биектау районыннан килгән балаларның Яңа Ел теләкләрен үтәячәк.
«Салават күпере» торак комплексында зур яңа поликлиника ел ахырына кадәр ачылачак. Казанның 12 нче клиник хастаханәсе поликлиникасының «Салават Күпере» торак комплексындагы филиалының үзенчәлеге шунда, биредә балалар һәм өлкәннәр бүлекләре, хатын-кызлар консультациясе һәм ашыгыч медицина ярдәме подстанциясе бер урында урнашкан.
