«Күпме җырлар сиңа багышланган». Халыкара хатын- кызлар көненә багышланган әдәби-музыкаль композиция.
Шөкер дөньяларга,
безне юатырга
әле ярый сез бар.
Сезне юатырга,
табып югалтырга
әле ярый без бар,
кызлар.
(Кадыйр Сибгатуллин)
Бәйрәмнәр арасында халык күңеленә, җанына кереп калганнары була. Бүген нәкъ шундый олы, яктылыкка һәм нурга төренгән бәйрәм. Без кадерле хатын-кызларыбызны олы бәйрәмнәре белән котлыйбыз, бәхет һәм шатлыклар, гаилә һәм ил-көн иминлеге телибез һәм бәйрәм бүләге итеп шагыйрьләребезнең гүзәл затларыбызга багышланган шигъри гөлләмәсен тәкъдим итәбез. Аларны Кәрим Тинчурин исемендәге Татар дәүләт драма һәм комедия театрының яшь артистлары Булат Зиннәтуллин һәм Салават Хәбибуллин укый.
