Иртәнге чыгарылыш
“Казан Экспо” мәйданчыгында “Россия – Ислам дөньясы” XVI халыкара икътисадый форумын һәм хәләл күргәзмәсен ачу тантанасы булды. Тантанада Россия Федерациясе Хөкүмәте Рәисе урынбасары Марат Хөснуллин, Татарстан Рәисе Рөстәм Миңнеханов, Ислам Хезмәттәшлеге Оешмасы генераль секретаре урынбасары Әхмәд Кавеса Сенгендо катнашты.
“Россия – Ислам дөньясы” XVI халыкара икътисадый форумы кунаклары хәләл күргәзмә экспозициясе белән танышты. Бу Россиядә инвестиция һәм инфраструктура проектларының иң зур халыкара күргәзмәсе. Катнашучылар үз продукцияләрен һәм технологияләрен тәкъдим итеп кенә калмыйча, бизнесменнар, инвесторлар, төрле илләр вәкилләре белән эшлекле багланышлар урнаштыра ала.
Малайзия Премьер-министры Әнвәр Ибраһим “Россия_Ислам дөньясы” Халыкара форумында катнашу өчен Казанга килде. Татарстан Рәисе Рөстәм Миңнеханов мөхтәрәм кунак белән очрашты.
Көндезге чыгарылыш
Казанда “Россия – Ислам дөньясы” 16 Халыкара икьтисадый форумы эшен дәвам итә. Бу минутларда Бәшир Рәмиев исемендәге Ай ти паркта “Россия – Ислам дөньясы” стратегик караш төркеме утырышы дәвам итә. Аны Татарстан Рәисе, төркем Рәисе Рөстәм Миңнеханов ачты. Россия Хөкүмәте Рәисе урынбасары Марат Хөснуллин Россия Президенты Владимир Путинның сәламләвен укыды.
Россия Хөкүмәте Рәисе урынбасары Марат Хөснуллин “Россия — Ислам дөньясы” XVI халыкара икътисадый форумында катнашучыларга рәхмәт әйтте. Бу хакта ул Илһам Шакиров исемендәге концерт залында форумны уздыру уңаеннан үткәрелгән тантаналы кабул итүдә белдерде.
Татарстан Дәүләт Киңәшчесе, республиканың беренче Президенты Минтимер Шәймиев Төрекмәнстан белән дустанә мөнәсәбәтләрне үстерүдәге зур казанышлары өчен «Мәхтүмколый Фрагига 300 ел» истәлекле медале белән бүләкләнде.
Кичке чыгарылыш
Казанда БәширРәмиев исемендәге Ай ти паркта «Россия – Ислам дөньясы» стратегик караш төркеменең еллык утырышы узды. Анда Россия Федерациясе Хөкүмәте Рәисе урынбасары Марат Хөснуллин, Татарстан Рәисе, «Россия – Ислам дөньясы» стратегик караш төркеме Рәисе Рөстәм Миңнеханов, Малайзия Премьер-министры Әнвәр Ибраһим, Ислам Хезмәттәшлеге Оешмасы Генераль секретаре урынбасары Тека Мөхәммәд Сәлах, Россия Президентының Идел буе федераль округындагы Тулы вәкаләтле вәкиле Игорь Комаров, башка рәсми затлар катнашты.
Татарстан Рәисе Рөстәм Миңнеханов «Беренчеләр хәрәкәте» гомумроссия иҗтимагый-дәүләт балалар һәм яшьләр хәрәкәте идарәсе рәисе Артур Орлов һәм яшьләр эшләре буенча Федераль агентлык җитәкчесе Григорий Гуров белән очрашты. Төбәк дәрәҗәсендә яшьләр сәясәте, «Беренчеләр хәрәкәте» катнашындагы чараларны гамәлгә ашыру мәсьәләләре турында фикер алыштылар.
Игенчеләр язгы чәчүне тиз арада һәм сыйфатлы итеп башкарып чыгу өчен бу көннәрдә бар тырышлыкларын куеп эшлиләр. Республикада 1 миллион 760 мең гектарда чәчү планлаштырылган, шуның 1 миллион 256 мең гектары чәчелгән. Бу барлык мәйданның 71 проценты.
