Иртәнге чыгарылыш.
Россия Президенты Владимир Путин Мәскәүдә югары дәүләт бүләкләрен тапшырды. Казан мэры Илсур Рәис улы Метшин 2 дәрәҗә «Ватан алдындагы казанышлары өчен» ордены, «Казанькомпроссормаш» акционерлык җәмгыяте токаре Геннадий Владимирович Евтеев «Фидакарь хезмәт өчен» ордены белән бүләкләнделәр.
Татарстан Рәисе Рөстәм Миңнеханов 1944 елда нигез салынган Әлмәт татар дәүләт драма театрында булды.Ул Әлмәт театры коллективына «Мәдәният һәм сәнгатьтәге казанышлар өчен» орденын тапшырды. Бүләк мәдәният һәм сәнгать өлкәсендәге казанышлары, күпьеллык нәтиҗәле эшчәнлеге өчен Россия Президенты Владимир Путин Указы белән бирелде.
Азнакай районының Мәлбагыш авылында иҗтимагый-мәдәни үзәкне ачу тантанасы булды. Анда Татарстан Рәисе Рөстәм Миңнеханов катнашты. Үзәк заманча техника белән җиһазландырылган: мультимедиа җиһазлары булган күпфункцияле зал, уңайлы китапханә һәм административ блок.
Көндезге чыгарылыш.
Әлмәт газ эшкәртү заводында метаннан азык аксымы җитештерүне комплекслы сынау башланды. Завод эшчәнлеге белән Татарстан Рәисе Рөстәм Миңнеханов катнашты. Ул елына 1 мең тонна аксым җитештерә башлауны мөһим вакыйга дип атады.
«Татарстан муниципаль берәмлекләрендә эшмәкәрләрнең иң яхшы иҗтимагый советы» VI республика конкурсында халык тавыш бирүе тәмамланды. «Халык сайлавы» номинациясендә 19 мең 500гә якын тавыш җыйган Яшел Үзән районы җиңүче булды. Бүләкләү тантанасы бүген Яшел Үзәндә узачак.
Бүген гомуми урта белем мәктәпләрендә укучылар өчен бердәм дәүләт имтиханнары башланды. Чыгарылыш сыйныф укучылары имтиханнарны тарих, әдәбият, химия фәннәреннән тапшыралар.
Кичке чыгарылыш.
Россия Президенты Владимир Путин Татарстан Рәисе Рөстәм Миңнехановның ташламалы ипотеканы 14 яшькә кадәрге балалары булган гаиләләр, шулай ук махсус хәрби операциядә катнашучыларның гаиләләре өчен киңәйтү тәкьдимен хуплады.
Россия ПрезидентыВладимир Путин шулай ук Татарстан Рәисе Рөстәм Миңнехановның мәктәпләр һәм балалар бакчалары төзү нормативларын үзгәртү тәкъдиме белән килеште. Россия Хөкүмәтенең һәм Дәүләт Советының Рөстәм Миңнеханов җитәкләгән «Яшәү өчен Инфраструктура» юнәлеше буенча комиссиясе бу һәм башка мәсьәләләр буенча үз тәкъдимнәрен шулай ук быелның 15 июненә җиткерергә тиеш.
БРИКС кышкы уеннары программасы әле формалашмаган, шулай да Татарстанның инфраструктурасы ярышларны агымдагы елның кышында ук уздырырга әзер. Бу хакта республика спорт министры Владимир Леонов белдерде.
Бүген бердәм дәүләт имтиханының төп чоры башланып китте. Чыгарылыш сыйныф укучылары БДИны тарих, әдәбият, химия буенча яздылар. Татарстан Мәгариф һәм фән министры Илсур Һадиуллин сөйли.
