Иртәнге чыгарылыш
Татарстан Рәисе Рөстәм Миңнеханов Россиянең атказанган спорт мастеры, Казан теннисчысы Вероника Кудерметова белән очрашты. Вероника Уимблдон Халыкара Зур шлем теннис турнирында парлы ярышлар җиңүчесе. Якташыбыз Бельгиядән Элизе Мертенс белән парда Уимблдон чемпионы булды.
Республикада махсус хәрби операциядә катнашучылар һәм ветераннар арасында «Татарстан Рәисе Кубогы»на спорт ярышлары узачак. Бу „Татарстанда җәй» программасы нигезендә гамәлгә ашыра торган проектларның берсе.
Татарстан шефлыкка алган Рубежное шәһәрендә республика вице-премьерлары Васил Шәйхразиев һәм Фәнил Әһлиуллин җитәкчелегендәге делегациясе булды. Шәһәр башлыгы вәкаләтләрен вакытлыча башкаручы Евгений Шаталин белән очрашуда инфраструктураны торгызу, торак фондын капиталь төзекләндерү мәсьәләләре, шулай ук кече һәм урта бизнеска ярдәм чаралары турында фикер алыштылар.
Көндезге чыгарылыш
Татарстан үсешнең иң яхшы нәтиҗәләрен күрсәтүче төбәкләре арасына керде. Бу хакта төбәк җитәкчеләре белән уртак утырышта Россия вице-премьеры Марат Хөснуллин сөйләде.
Кукмарада “Безнең ишегалды” фестивале узды. Кукмарада 55 ишегалды территориясенең 25е төзекләндерелгән. Бәйрәмдә күпфатирлы йортларда яшәүчеләргә – төзекләндерүдә актив катнашучыларга Татарстан Рәисе Рөстәм Миңнехановның Рәхмәт хатлары тапшырылды. «Татарстанда җәй» проекты чаралары да кызыклы үтте.
Татарстанда 14 чыгарылыш сыйныф укучысы Бердәм дәүләт имтиханнарын ике фәннән йөзәр баллга тапшырган. Тагын 289 укучы бер фәннән 100әр балл җыйган. Бу хакта республика мәгариф һәм фән министры Илсур Һадиуллин белдерде. Шунысын да искәртик: республикада математика, рус теле һәм сайланган фәннән Бердәм дәүләт имтиханнары нәтиҗәләре Россиядәге уртача күрсәткечләрдән югарырак.
Кичке чыгарылыш
Татарстан Рәисе Рөстәм Миңнеханов хөкүмәт йортында Россия Федерациясе сенаторлары һәм Федераль Җыенның Дәүләт Думасына Татарстаннан сайланган депутатлар белән очрашты. Анда республика Дәүләт Советы Рәисе Фәрит Мөхәммәтшин, Премьер-министр Алексей Песошин, Татарстан министрлыклары һәм ведомстволары җитәкчеләре катнашты.
Татарстан Рәисе Рөстәм Миңнеханов «Президент академиясенең Җәйге кампусы» Халыкара мәгариф форумында Россия Герое Рәсим Баксиков белән очрашты. Хәзер Россия Герое «Каһарманнар вакыты» федераль программасының икенче агымында белем ала. Ул республика Рәисеннән остазлык программасы буенча укыганда, үзенең остазы булуын сорады.
Татарстан Дәүләт Советы Рәисе Фәрит Мөхәммәтшин республика парламентында Чукотка автономияле округы Думасы Рәисе Леонид Николаев белән очрашты. Алар парламентара хезмәттәшлек юнәлешләре турында фикер алыштылар, шулай ук законнар үсешенә һәм төрле дәрәҗәләрдә үзара элемтәләрне ныгытуга бәйле мәсьәләләргә кагылдылар.
