Иртәнге чыгарылыш
Татарстан Рәисе Рөстәм Миңнеханов Кытайның Россиядәге Гадәттән тыш һәм Тулы вәкаләтле Илчесе Чжан Ханьхуэй белән очрашты. Очрашу «Казан Экспо» үзәгендә «РОСТКИ» III Россия-Кытай хезмәттәшлеге форумында узды. Анда Кытайның Казандагы Генераль консулы Сян Бо катнашты.
Соңгы ун елда Татарстанда 450 гә якын төзекләндерелгән иҗтимагый киңлек булдырылды. Аларны гамәлгә ашыруга федераль һәм республика бюджетларыннан 28 миллиард 100 миллион сум акча юнәлдерелгән. Бу хакта Татарстан Министрлар Кабинетында узган брифингта республика Төзелеш, архитектура һәм ТКХ министрының беренче урынбасары Дамир Шәйдуллин әйтте.
Габдулла Тукай исемендәге Татар Дәүләт филармониясенең 89 сезонына багышланган матбугат очрашуы узды. Филармония директоры Кадим Нуруллин һәм дүрт иҗат коллективы җитәкчеләре яңа сезонның программасы, яңалыклары белән таныштырдылар.
Көндезге чыгарылыш
Соңгы елларда Кытай республика икътисадына төп чит ил инвесторы булды. Бу хакта Татарстан Рәисе Рөстәм Миңнеханов «РОСТКИ: Россия һәм Кытай — үзара файдалы хезмәттәшлек» III халыкара форумы пленар утырышындагы йомгаклау чыгышында әйтте.
Татарстан Рәисе Рөстәм Миңнеханов Кытайның Хубэй провинциясенең Халык сәяси консультатив советы рәисе Сунь Вэй белән очрашты. Татарстан Рәисе хезмәттәшлекнең перспектив юнәлешләрен карау өчен эш төркемен төзергә тәкъдим итте.
Татарстан Авыл хуҗалыгы һәм азык-төлек министрлыгы мәгьлүматлары буенча, республикада бөртекле һәм кузаклы культуралар барлык мәйданның 53 процентында суктырылган. 2 млн 700 мең тонна ашлык җыеп алынган.
Кичке чыгарылышлар
Татарстан Рәисе Рөстәм Миңнеханов хөкүмәт йортында Россия Төзелеш һәм торак-коммуналь хуҗалык министры Ирек Фәйзуллин белән очрашты. Төбәктә төзелеш һәм торак-коммуналь хуҗалык өлкәсендә республика һәм федераль программаларны гамәлгә ашыру мәсьәләләре, шулай ук илкүләм проектларда билгеләнгән актуаль бурычлар турында фикер алыштылар.
Татарстан Рәисе Рөстәм Миңнеханов «Казан Экспо» күргәзмә үзәгендә Россия авыл хуҗалыгы министры Оксана Лут белән очрашты. Алар республиканың агросәнәгать комплексын үстерүнең төп юнәлешләре турында фикер алышты.
Бүген Казанда татар телендә тапшырулар оештыручы радиоканаллар арасында волейбол буенча традицион ярыш узды. Аны узган елгы турнир җиңүчесе – “Тәртип” радиосы оештырды.
Татарстан Рәисе Рөстәм Миңнеханов һәм Россия Федерациясе авыл хуҗалыгы министры Оксана Лут республикада фри-бәрәңге җитештерүче беренче заводны ачуда катнаштылар. Предприятие «Чистай» индустрия паркында урнашкан.
Татарстанда сайлауларга иҗтимагый мониторинг беренче ел гына алып барылмый, ә 2018 елдан башлап, сайлауларга иҗтимагый контроль хокукы республиканың Иҗтимагый палатасына закон нигезендә беркетелгән. Бу хакта Казандагы «Сайлау» үзәгендә узган брифингта республика Иҗтимагый палатасы рәисе Зилә Вәлиева әйтте.
Татарстан Дәүләт Советы Рәисе Фәрит Мөхәммәтшин Мәскәүдә Татарстан Республикасы мәдәният көннәре чараларында катнаша. Ул бөек шагыйрь Габдулла Тукай һәйкәленә чәчәкләр салды. Татар мәдәни үзәгенең актлар залында җәмәгать эшлеклесе, Татарстанның халык шагыйре Разил Вәлиев истәлегенә багышланган музыкаль-әдәби кичә узды.
