Иртәнге чыгарылыш
Татарстан Рәисе сайлауларында тавыш бирү өчен, махсус хәрби операция зонасында биш территория сайлау участогы ачыла. Бу хакта республика Үзәк сайлау комиссиясе рәисе Андрей Кондратьев Татарстан Министрлар Кабинетында узган брифингта әйтте.
“Бердәм Россия» партиясенең Халык программасы ярдәмендә Татарстанның төрле районнарында бик күп социаль объектлар барлыкка килә. Лаеш районында ике елда балалар өчен генә дә шундый 11 учреждение: балалар бакчалары, мәктәпләр, күп функцияле үзәкләр төзелгән. Бу хакта партиянең Татарстан төбәк бүлеге комиссиясенең Лаеш районында узган күчмә утырышында Россия Дәүләт Думасы депутаты Татьяна Ларионова белдерде.
Казанда 21 нче «Алтын мөнбәр» халыкара кинофестивале тәмамланды. 5 көн дәвамында шәһәр халкы төрле илләрнең мәдәниятен, рухи кыйммәтләрен чагылдырган фильмнары карый алды.
