Бу атнада безнең эфирда зур вакыйга көтелә. Чираттагы премьера! 5 һәм 6 нче сентябрь көннәрендә игътибарыгызга Татарстанның халык язучысы, Республикабызның Г.Тукай исемендәге Дәүләт премиясе лауреаты Зөлфәт Хәкимнең “Бер сәгатьтә ничә мизгел бар?” романы буенча өр-яңа радиоспектакль тәкъдим ителәчәк.
Хөрмәтле радиотыңлаучылар, Татарстан радиосы Татарстан Республикасы Рәисе каршындагы татар телен һәм Татарстанда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән яңа радиоспектакльләр әзерләвен дәвам итә. Быел без аларны ТР Рәисе каршындагы Татар телен һәм Татарстанда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән үткәрелгән ябык әдәби конкурста җиңгән әсәрләр буенча эшлиячәкбез.
Исегезгә төшерәбез, моңа кадәр без татар әдәбияты классиклары Галимҗан Ибраһимовның “Казакъ кызы”, Фатих Хөснинең “Йөзек кашы”, Заһир Бигиевнең “Зур гөнаһлар”, Габдулла Тукайның “Исемдә калганнар” бүгенге язучылардан Хәниф Хәйруллинның “Киржаклар иле”, Вакыйф Нуруллинның “Шинельсез солдатлар”, “Марат Кәбировның “Җир турында җыр”, Рафис Корбанның “Тәүбә көне”, Фоат Садриевның “Кайту”, Нәбирә Гыйматдинованың “Уйламаган көнем юк”, Айгөл Әхмәтгалиеваның “Таллыкүлдә былбыл бар”, башкорт язучысы Мәрьям Буракаеваның “Сөйгән яр бер була”, хикәяләр остасы Фаил Шәфигуллин, Ләбиб Лерон, Галимҗан Гыйльманов, Рөстәм Галиуллин, Ләлә Сабирова әсәрләре буенча радиоспектакльләр әзерләп эфирга тапшырдык. Шулай итеп, фондыбыз бик күпкә яңарды һәм баеды. Иң мөһиме – алар халыкка хезмәт итә. Туган телебезнең матур аһаңен халыкка җиткерүдә, радиотыңлаучыларны рухи яктан баетуда, татар әдәбиятының бай дөньясына якынайтуда ифрат зур роль уйный.
Татарстанның халык язучысы, Республикабызның Г.Тукай исемендәге Дәүләт премиясе лауреаты Зөлфәт Хәкимнең “Бер сәгатьтә ничә мизгел бар?” романы 2022 нче елда комиссиянең әдәби конкурсында роман номинациясендә җиңгән әсәрләрнең берсе. Иң мөһиме киң катлам укучылар тарафыннан җылы кабул ителгән әсәр.
Роман басылып чыгуга Татарстан Язучылар берлегенең Проза һәм тәнкыйть остаханәләре, берләшеп, әлеге роман буенча фикер алышкан иде. Шунда әдәбият галиме Әлфәт Закирҗанов әсәргә мондый бәя бирде:
“Автор яшәү – үлем, сугыш – тынычлык, яхшылык – явызлык кебек гомумкешелек проблемаларын алгы планга чыгара. Гыйбрәтле күренешләр аша укучыны җитди уйлануларга китерә.”
Менә шундый җитди эшкә алынуыбыз һәм аны сезнең алда тәкъдим итү безнең өчен шактый дулкынландыргыч мизгелләр. Хөрмәтле радиотыңлаучылар, премьераны 5 сентябрь көнне 13 сәгать 10 һәм 15 сәгать 10 минутта, калган серияләрен 6 сентябрь көнне 11 сәгать 10, 13.10 һәм 15.10, 16 сәгать 10 минутта ишетә аласыз.
Ә бүген бездә тагын бер вакыйга! Күркәм гадәт буенча Сезне Татарстанның халык язучысы, драматург, шагыйрь һәм автор-башкаручы Зөлфәт Хәкимнең үзе белән очрашу көтә. Аның белән әңгәмәбез “Бер сәгатьтә ничә мизгел бар” романының язылу тарихы турында сөйләшүдән башланды.
