Шушы көннәрдә Арча районы мәдәният йортында данлыклы “Арча егетләре” халык вокаль ансамбленә 55 ел, һәм аның оештыручысы, алыштыргысыз җитәкчесе, күренекле музыкант Марсель Фәйзрахмановның тууына 85 ел тулу уңаеннан “Ни белән үлчәнә үткән гомер?” дип исемләнгән әдәби — музыкаль кичә узды.
Биредә республикада гына түгел, хәтта чит төбәкләрдә дә даны яңгыраган «Арча егетләре» халык ансамбленә, төрле елларда йөрүчеләр җыелган.
Ансамбльнең тарихы 1971нче елга барып тоташа. Аны Арча педагогия училищесының җыр, музыка укытучысы Марсель Фәйзрахманов оештыра. Шул елның 23нче февраленә багышланган тантанада ансамбль, Фәтхерахман Әхмәдиев көенә, Роберт Әхмәтҗанов сүзләренә язылган “Солдатлар” җырын башкара. Бу көн тарихка “Егетләр” ансамбленең туган көне булып кереп кала. Һәм әйтергә кирәк, “Солдатлар” җыры бүген дә актуаль. Аны беләләр, кушылып җырлыйлар.
Арча егетләре ансамбленең алыштыргысыз җитәкчесе, аның оештыручысы Марсель Фәйзрахманов була. Исән булса аңа, 85 яшь тулыр иде. Россиянең халык мәгарифе отличнигы, Татарстанның атказанган мәдәният хезмәткәре, ул үзе дә ансамбль репертурын язган җырлары белән тулыландыра.
Ул шулкадәр күңел биреп, күп тырышлык, хезмәт куйган шәхес. Бар тормышын бу ансамбльгә багышлаган кеше дисәк тә, һич арттыру булмас.
Федерация халык мәгарифе отличнигы Суфия Мансур кызы, гаиләләре белән ике улы ихластан горурланып, хәтирәләрне барлап утырды. “Арча егетләре” халык ансамбле кайда гына чыгыш ясаса да, үзләренең үзгә милли киемнәре, бары тик үзләренә генә хас хәрәкәтләре белән аерылып тора. Ансамбльне һәрдаим хуплап, аның киләчәге өчен янып йөрүчеләрдән Арча педагогия көллиятен 21 ел җитәкләгән Илдус Сәгъдиев була. Кызганыч, күптән түгел, 16 нче сентябрдә ул арабыздан китеп барды. Аның ансамбль турында әйткән сүзләре, безнең фондта саклана.
Арча егетләре халык ансамбле төрле елларда бихисап фестивальләрдә, халыкара бәйгеләрдә лауреат исемнәренә лаек була. 2010нчы елда ансамбльнең 40 еллыгы уңаеннан “Арча егетләре” халык җыр ансамбле” китабы дөнья күрде.
Әлеге ансамбльгә йөреп, инде үзләре җитәкче булган шәхесләр үзләренә алмаш үстергән, сәхнәдә оныклары чыгыш ясый.
Арча егетләре ансамбленә йөргән бихисап егетләр кызлар, Марсель Фәйзраманов турында үзләренең җылы хатирәләре белән уртаклашты.
Яшьләр исә әлеге уку йортына кергәнче үк, беренче чиратта, ансамбльгә йөрү ягын карый.
Юбилей кичәсе котлаулар, җыр–биюләр, ансамбльгә төрле елларда йөргән егетләрнең һәм кунакларның чыгышлары белән үрелеп барды. 70нче еллар ахырында ансамбльнең баянчысы булган, хәзер Россиянең атказанган, Татарстанның халык артисты, профессор, Марсель Фәйзрахмановның бер туган энесе, үтә дә туган җанлы Айдар Фәйзрахманов, үз ансамбле белән чыгыш ясады.
Марсель Фәйзрахманов җитәкчелегендәге ансамбль “Арча гимны”, “Килегез, сез, Арча якларына”, “Туган җиреңнән китмә”, “Арча көллияте”, “Хәлимә” “Җиләкле җәй”, кебек җырлары белән бөтен татар дөньясына танылды.
Марсель Фәйзрахманов оештырган “Арча егетләре” Халык җыр ансамбле, Арча көллиятендә бүгенге көндә дә уңышлы эшләп килә, районда, республикада үткәрелгән төрле чараларның бизәге буларак чыгыш ясый. Хәзер ансамбльне Нәҗип Җиһанов исемендәге Казан Дәүләт консерваториясен тәмамлаган музыка укытучысы Диләрә Хәйдәрҗанова җитәкли. Марсель Фәйзрахманов нигез салган ансамбльгә чарада аның исеме бирелде. Хәзер ул Марсель Фәйзрахманов исемендәге «Арча егетләре» халык вокаль ансамбле. Нигез салучысы үтә дә сәләтле, милли җанлы, үткен, киң кырлы шәхес булган кебек, ансамбльдә алга таба нык, горур булып, җыр — моңнары җиһанга яңгырап торсын!
