ТР Рәисе Рөстәм Миңнеханов «Росатом» Дәүләт корпорациясе һәм Россия федераль атом-төш үзәге – Бөтенроссия эксперименталь физика фәнни-тикшеренү институты делегациясе белән очрашты. Бу хакта республика җитәкчесенең матбугат хезмәте хәбәр итә.
Ул мәгариф, сәнәгать һәм мәгълүмати технологияләр өлкәләрендә уртак проектларны гамәлгә ашыруда хезмәттәшлек иткән өчен коллегаларына рәхмәт белдерде. Миңнеханов Татарстанның шактый зур сәнәгать потенциалына һәм компетенцияләргә ия булуын, ә республика предприятиеләренең «Росатом» белән берлектә алдынгы технологияләр кертүен һәм яңа проектлар гамәлгә ашыруын билгеләп үтте.
«Росатом»ның безнең университетларны терәк югары уку йортлары арасына кертүе, Казан илкүләм тикшеренү техник университеты (КАИ) базасында алдынгы инженерлык мәктәбенең төп партнерына әверелүе безнең өчен бик мөһим. Бу безнең югары уку йортларына студентлар әзерләүне яхшыртырга, ә Росатомга җитештерүне әзерлекле инженер кадрлар белән тәэмин итәргә мөмкинлек бирде. Яңа уртак проектларны гамәлгә ашыруга юнәлдерелгән хезмәттәшлекне дәвам итәрбез дип ышанам», — диде ТР Рәисе.
