Хәерле көн, мөхтәрәм телевизор караучылар! Илдә ниләр бар икән? Шул сорауга татар матбугаты ничек җавап биргәнлеген бергәләп белешик.
“Климат җылынгач, кешенең кыяфәте дә үзгәрә” дип яза “Шәхри Казан” газетасы. Шушы көн җитеп тә җиргә кар ятмаганын күреп торганлыктан, без инде кышның җылына баруына күнегеп барабыз бугай. Кышкы кием дип зурдан кубасы булмаганга да күңелебез була. Ләкин кыяфәтне үк үзгәртәсе килми инде үзе. Ә Кембридж университеты галимнәренең үз туксаны туксан- салкыннар кешенең гәүдәсе hәм баш миенең зураюына, ә җылылык киресенчә-кечерәюенә китерә дип раслый. Ышанырсың да, әнә бит, җылы якларда еш булучы түрәләребезнең башы еш кына эшләп җиткермәвен үзебез дә күреп-белеп торабыз. Башы дөрес эшләгән түрә үз эшен башкарган өчен хөкүмәттән хезмәт хакы белән бергә яшереп кенә ришвәт тә алырга тиешме соң? Тиеш түгел, дип кырт кисә Татарстан прокуроры Альберт Суяргулов “Ватаным Татарстан” газетасында. Быел ришвәчелекнең 453 очрагы төркәлгән республикада. Яшереп кенә бирелә торган акчаның күләме дә билгеле- уртача 377 мең сум. Былтыр 263 мең сум булган. Димәк, нәфес торган саен арта. Ә бит әле болары тотылган кадәресе генә Ә тотылмый калганы?
Бу уңайда “Ватаным Татарстан” газетасының сәяси күзәтүчесе Рәшит Фәтхрахманов “Авылны коткару юлы” дигән язмасында бер кызыклы фикере белән уртаклаша. Кытайда түрәләрне авылның хәлен җиңеләйтергә дип авылга эшкә җибәрә башлаганнар икән. Россиядә дә булган андый тәҗрибә- меңәрләгән кала коммунисты авылга җитәкче итеп җибәрелгән. Халыкның канын кашыкка тамызу өчен. Шул чордан бирле бит инде бездә халык авылдан чыгып китү ягын кайгырта. Ә Рәшит әфәнде түрәлекне атасыннан балага бирүне туктатып, совет чорындагы кебек ике елын авылда тракторда эшләп, сыер савып үткәргәннән соң гына теге яки бу җитәкче эшкә алырга кирәк ди. Чыннан да, бәлки тормышның ни икәнен төптән аңлаганнан соң намусларына көч килеп, ришвәт алудан туктарлар иде бәлки.
Әмма сәяси күзәтүченең сүзенә колак салучы булмас кебек. Үткән атнада Мәскәүдәге Дума депутатларының авыл советларын бетерүне күздә тоткан закон кабул итәргә ашыгулары шул хакта сөйли. “Халыктан сораганнармы?” дип ярсып чыгыш ясады Татарстан Дәүләт Советында бу хакта Рөстәм Миңнеханов. Әлеге проблема барыбызга да кагылганлыктандыр, “Шәхри Казан” газетасы да “Ватаным Татарстан” газетасы да бер булып әлеге темага язмалар бастырып чыгарганнар.
Чыннан да, матур гына эшләп яткан колхозларны юкка чыгарып, авылның тамырына балта чапканнан соң мә тагын берне- инде халыкның барып егылыр соңгы идарә системасына кизәнү. Дөрес, Татарстанның каршы килүен аңлап, законның гамәлгә керүен безнең өчен 35нче елга кадәр озайттылар озайтулыкка. Ә инде аңа кадәр, Хуҗа Насретдин әйтмешли, я патша , я ишәк, я мин үләм.
Алга таба барыбызга да зыянлы үзгәртүләрне күрмичә генә яшәргә туры килсә иде дигән теләктә бүгенгә сезнең белән саубуллашам. Исәнлектә күрешик!
