Изге Синод әгъзалары Татарстан Республикасы Рәисе Рөстәм Миңнехановка һәм Казан һәм Татарстан митрополиты Кириллга Мәскәү һәм бөтен Русь Патриархы Кириллның Татарстанга сәфәре барышында күрсәткән игътибарлары һәм җылы кабул итүләре өчен рәхмәт белдерде.
Рәхмәт сүзләре Мәскәү һәм бөтен Русь Патриархы Кирилл рәислегендә Мәскәүдә Данилов монастырендәге Патриарх һәм Синодаль резиденциядә узган Рус Православие чиркәвенең Изге Синоды утырышында әйтелде.
Утырышта Патриарх Кирилл Рус православие чиркәвенең епархияләргә, аерым алганда, Татарстан митрополиясенә сәфәре турында сөйләде.
Исегезгә төшерик, 20-22 июльдә Рус православие чиркәве башлыгы Татарстанда булды. 21 июльдә ул Казан Алла Анасы иконасы пәйда булу уңаеннан тантаналы литургия үткәрде. Гыйбадәт кылу Казан соборында узды, анда меңләгән дин тотучы җыелды.
Шул ук көнне ул Богородица монастыре биналары комплексын, шул исәптән Никола Тульский храмын реставрацияләү барышы белән танышты. Аннан соң Патриарх Кирилл Казан Кремлендә булды, республика Рәисе һәм Татарстан Дәүләт Киңәшчесе Минтимер Шәймиев белән очрашты.
Кич белән Патриарх Казансу елгасындагы Спас Нерукотворный храмын изгеләндерде. Икенче көнне храм озак реставрация процессыннан соң килүчеләр өчен ачылды.
Икенче көнне Рус православие чиркәве башлыгы Чаллыдагы Воскресение кафедраль соборының нигез ташын изгеләндерде. Шулай ук ул КАМАЗның фәнни-техник үзәге полигонында булды. Патриарх Кирилл җитештерү процессы белән танышты, предприятие күргәзмәсендә булды һәм «КАМАЗ» руле артында йөреп карады.
