Иртәнге чыгарылыш
Бүген – Татарстан Республикасының Төп Законы – Конституциясе көне. Шул уңайдан Республика Рәисе Рөстәм Миңнеханов Татарстан халкына мөрәҗәгать белән чыкты.
Татарстан Дәүләт Советында «Мин – Россия гражданины» дигән тантана узды- яшь гражданнарга паспортлар тапшырылды. Чара ике дәүләт бәйрәменә – Халыклар бердәмлеге көненә һәм республикабызда 6 ноябрьдә билгеләп үтелә торган Татарстан Конституциясе көненә багышланды. Россия гражданының төп документын мәктәп укучыларына Дәүләт Советы Рәисе урынбасары Юрий Камалтынов тапшырды.
Татарстан Министрлар Кабинетында 2025 елда республикада милек салымнарын түләү мәсьәләләренә багышланган брифинг узды. Федераль салым хезмәтенең Татарстандагы Идарәсе җитәкчесе Марат Сафиуллин билгеләп үткәнчә, 1 декабрьгә узган ел өчен милеккә, транспортка салымнарны түләп бетерергә кирәк.
Көндезге чыгарылыш.
Россия Президенты Владимир Путин 2026 -2036 елга кадәрге чорга Россиянең милли сәясәте Стратегиясе проектын мөмкин кадәр тизрәк әзерләргә кушты. Бу хакта ул милләтара мөнәсәбәтләр буенча совет утырышында әйтте. Владимир Путин шулай ук үткән стратегияне гамәлгә ашыру барышында башкарылган эшләр өчен рәхмәт белдерде.
Бүген – Татарстан Республикасының Төп Законы – Конституциясе көне. Шул уңайдан Республика Рәисе Рөстәм Миңнеханов Татарстан халкына мөрәҗәгать белән чыкты.
Татарстан Дәүләт Советы Рәисе Фәрит Мөхәммәтшин республика халкын Татарстан Конституциясе көне белән котлады. Ул телеграмм каналында архивта сакланган видеоязманы урнаштырган, 1992 елның 6 ноябрендә булган истәлекле вакыйганы искә төшереп язган.
Кичке чыгарылышлар.
Ютазы һәм Баулы районнарының аерым территорияләрендә югары патогенлы кош гриппы ачыклану һәм аның таралу куркынычы cәбәпле, карантин игълан ителде. Бу турыдагы Указны Татарстан Рәисе Рөстәм Миңнеханов имзалады.
Татарстан Конституциясе көне хәзерге яшьләргә хокук аңы һәм сәяси әдәплелекне тәрбияләүгә хезмәт итә. Бу хакта Федераль Җыенның Дәүләт Думасы депутаты Татьяна Ларионова белдерде. Парламентарий билгеләп үткәнчә, ил өчен авыр шартларда Татарстан, Россия составында калып, киләчәккә нигезләнеп, үз Конституциясен төзергә, республиканың күпмилләтле халкына тыныч тормыш тәэмин итәргә карар кабул итте.
Татарстан Халыклар дуслыгы йортында «Без россиялеләр!Яшь патриотлар карашы” дигән төбәкара җыен ачылды. Аның эшендә Россиянең 10 төбәгеннән 250дән артык активист катнаша.
Бүген Татарстан Конституциясе көне билгеләп үтелә. Республика халкын Татарстан Рәисе Рөстәм Миңнеханов, Дәүләт Советы Рәисе Фәрит Мөхәммәтшин котлады.
12-22 ноябрьдә Казанда «Россия-Көнчыгыш» Халыкара милли мәдәниятләр фестивале — “Шәрык базары” үтәчәк. Быел ул дүртенче тапкыр оештырыла. Фестиваль Россиянең 20 төбәгеннән, 40 якын һәм ерак чит илләрдән, шул исәптән 30 ислам дәүләтеннән катнашучыларны җыя.
Теләче районының Җөри авылында мәшһүр җырчы Таһир Якупов исемендәге 3нче Бөтенроссия фестивале узды. Быел фестивальгә 153 гариза кабул ителгән. Анда Татарстан, Башкортостан, Мария Эл, Чувашиядән, Казахстан, Төркия һәм Кытайдан да катнашырга теләк белдергәннәр. Шулардан 10 кеше лауреат булды.
