ТР Рәисе Рөстәм Миңнеханов Пекинда узучы «Auto China 2026» халыкара автомобиль күргәзмәсендә булды. Бу хакта ТР Рәисе матбугат хезмәте хәбәр итә.
Автосалон дөньякүләм дәрәҗәдәге иң зур һәм абруйлы тармак вакыйгаларының берсе санала. Быел ул 24 апрельдә берьюлы ике мәйданчыкта ачылды – China International Exhibition Center (Shunyi Hall) һәм Capital International Exhibition Center of China.
Күргәзмәнең төп темасы – Future of Intelligence, ягъни «Фәһем киләчәге». Экспозиция автомобиль төзелеше тармагында гамәлгә ашырылучы цифрлаштыруга, интеллектуаль системаларга һәм яңа технологияләргә багышланган.
Татарстан Кытайның сәнәгать предприятиеләре белән актив хезмәттәшлек итүен дәвам итә (шул исәптән автомобиль тармагында да). Хезмәттәшлекнең төп юнәлешләре арасында – электромобильләрне, водород ягулыгында эшләүче транспортны, автоном йөрү системаларын үстерү һәм ясалма фәһем мөмкинлекләрен куллану.
