Хоккейчы балалар утырган автобус Лаеш районында юл-транспорт һәлакәтенә юлыккан
Бүген Татарстанның Лаеш районында Казан – Боровое Матюшино трассасында балалар хоккей командасын алып баручы автобус юл-транспорт һәлакәтенә юлыккан. Бу хакта ТР Прокуратурасы хәбәр итә.
Ford Focus автомобилен йөртүче каршы як полосага чыккан, анда ул балалар утырган Ford маршрут автобусы белән бәрелешкән.
«Татар-информ»га билгеле булганча, микроавтобус белән җиңел машина бәрелешкән, шуннан соң микроавтобус кюветка төшеп ауган. Агентлык мәгълүматлары буенча, автобуста барган берничә бала зыян күргән. Алар барысы да Республика балалар клиник хастаханәсенә китерелгән. Аларның хәле турындагы мәгълүмат ачыклана. Автобуста 8-9 яшьлек барлыгы 12 бала булган.
Әлеге факт буенча тикшерү башланды. Вакыйга урынына Лаеш районы прокуроры Андрей Наумов та килгән.
