РФ Президенты Владимир Путин Бөтенроссия һөнәри конкурслары педагог-лауреатлары белән очрашуда Россия халыклары телләре өчен цифрлы белем бирү контенты китапханәсен булдыру идеясен бәяләде. Видеоэлемтә аша оештырылган сөйләшүдә катнашкан вепс теле укытучысы шундый тәкъдимне җиткерде. Бу хакта ТАСС агентлыгы хәбәр итә.
«Сез Россия халыкларының милли мәдәниятен үстерү, туган телләрне өйрәнү күпмилләтле Россия милләтенең бердәмлегенә, безнең белем бирү платформаларының берлегенә комачауламый, дип әйттегез. Киресенчә, боларның барысы да бу бердәмлекне раслаячак кына. Шуңа күрә мин сезнең белән тулысынча килешәм», – дип белдерде дәүләт башлыгы.
Бу контекстта Путин, тарихи һәм археологик тикшеренүләргә сылтама ясап, ил тарихы турындагы күзаллаулары белән уртаклашты. «Борынгы заманнарда славян һәм фин-угор кабиләләре бергә, иңне-иңгә куеп диярлек, чынлыкта бер территориядә яшәгән. Һәм бу казу эшләре фин-угор һәм славян кабиләләренең бер-берсе белән бөтенләй диярлек низагка кермәвен күрсәтә», – диде ул.
