8 һәм 9 октябрь көннәрендә Казанда «XIX гасыр ахыры-ХХ гасыр башында төрки-татар җәмгыятендә тарихи фикер һәм иҗтимагый-агарту процесслары» дигән халыкара фәнни-гамәли конференция узачак. Аны тарихчы, педагог һәм җәмәгать эшлеклесе Һади Атласиның тууына 150 ел тулуга багышлыйлар.
Оештыручысы – Татарстан Фәннәр академиясенең Ш.Мәрҗани исемендәге Тарих институты. Конференциядә Россия, Казахстан, Кыргызстан һәм Үзбәкстаннан татар һәм башка төрки халыкларның тарихын һәм мәдәниятен өйрәнүче галимнәр катнашачак.
Аерым сессияләр Һади Атласиның XIX гасыр ахыры-ХХ гасыр башы Россия империясе төрки халыкларының рухи мәдәниятен өйрәнүгә һәм мәгърифәткә, урта гасыр төрки–татар дәүләтләре тарихына керткән өлешенә багышланачак. Экспертлар шулай ук мәгариф һәм вакытлы матбугат системасы үсешен дә караячак.
