Хәерле көн, мөхтәрәм телевизор караучылар! Татар матбугаты ни дип борчыла? Әйдәгез, бергәләп шул сорауга җавап табып карыйк.
Татарстанда этләрне мәҗбүри төрки башлаячаклар, дип яза “Шәhри Казан” газетасы. Моңарчы дүрт аяклы дусларыбызны төркәү ирекле саналган hәм бу көтелгән нәтиҗәне бирмәгән. Закон үз көченә кергән очракта эт тоту кагыйдәләрен бозган өчен ике меңнән алып дүрт мең сумга кадәр штраф салу каралган. Сораштыруда катнашкан халыкның яртысы бу чараны дөрес дип саный. Чыннан да, әгәр дә син эт аласың икән, аның өчен җавап та бирергә әзер бул инде. Ул да бит шул ук җан иясе.
Ләкин шунысын да истән чыгармаска кирәк- бездә әле кайбер кешеләрнең кадере дә шул этләрнекеннән артык түгел.Халыкара оешмалар раславынча, хезмәт коллыгы хәзер Россиядә коллыкның иң киң таралган формасы булып тора икән. “Шәhри Казан” газетасындагы язмадан аңлашылганча, хезмәт коллыгына беркемгә кирәге калмаган, эзләүчеләре булмаган кешеләр эләгә икән. Мондый кешеләрне белдерүләр аша табалар, вахта ысулы белән эш тәкъдим итәләр. Авылларда рәтле-юнле эш таба алмаган ир-атлар да шул кармакка каба. Мондый коллык йортларына эләккәннәр үзләре генә аннан чыга алмый. Шундый көнгә калырга язмасын дип телик!
“Тамак хакы” күпме тора? “Ватаным Татарстан” газетасы әлеге сорауны беренче битенә чыгарып биргән. Азык-төлеккә киткән чыгымнарны берәр ничек йөгәнләп буламы? Язманы укыгач шул аңлашыла- без чама хисен белмибез икән- кирәккән-кирәкмәгән товарлар сатып алып, акчаны уйламыйча туздырабыз. Ни дисең инде- кесәңә карап тотасың акчаны.Ләкин язмадагы бер-ике сан гына гаҗәпләндерер тормышны төптән белгән кешеләрне. Имеш, безнең илдә яшәүчеләр тамак өчен аена 40 мең сум акча тота икән. Бу инде бүлнистәге уртача тән температурсы кебек-бар өзелгән кешенең тәм температурасы, бар тәне кызышып 40 гадуска җиткәне. Уртачасы-нормальный килеп чыга. Монда да шулай- бар рестораннан-ресторанга йөреп тамак туйдыручылар, бар ипи-сөткә акча таба алмый интегүчеләр. Менә шуннан уртачасы-40 мең. Ә хөкүмәт безгә җан асрау өчен аена 15 мең сум җитә дип раслый. Калганын үзегез карагыз.
Тамак, муллык мәсьәләсе янында кешенең рухи саулык проблемасы да кискен килеп баса бүген. “Ватаным Татарстан” газетасының сәяси күзәтүчесе Рәшит Фәтхрахианов адәм балаларының психикага бәйле проблемалары кайдан килеп чыгуы турында тәфсилләп аңлаткан. Ни юрасаң-шул булыр дип юкка гына әйтмиләр халыкта. Кыйбла югалган заманда урынсыз борчылулар, курку-шөбхәләнүләр кешене әллә ниткән авыруларга китереп чыгара. Шуңа да иртәгәсе көннең бүгенгесеннән яхшырак буласына ихлас ышанып, шуңа омтылып яшәүчеләрдән булсак иде дигән теләктә бүгенгә сезнең белән саубуллашам. Исәнлектә күрешик!
