Аккош күле янындагы мәйданга татар халкының милли бизәкләре төшерелгән яңа резина өслек җәелде. Аны җәю өчен 2 мең автомобиль шинасын эшкәрткәннән соң барлыкка килгән 13 тонна вак резина кисәге кулланылган. Бу хакта Казан мэриясе матбугат хезмәте хәбәр итә.
Кызгылт сары төсләрне чагылдыручы өслеккә беренче тапкыр татар халкының милли бизәкләренең берсе саналган лалә чәчәген хәтерләтә торган сурәтләр төшергәннәр.
Бизәк җөйсез резина белән каплау технологиясе ярдәмендә ясалган: сурәт өчен кулланылган резина кисәкләрен заводта ук буяп чыгарганнар. Буялган кисәкләрне алга таба полиуретан катнашмасы белән бутаганнар һәм алдан тигезләп җәелгән туфракка салып ныгытып беркеткәннәр.
