Татарстан Рәисе Рөстәм Миңнеханов 238 еллыгын билгеләп үтүче Казан дәүләт дары заводында булды. Бу хакта ТР Рәисе матбугат хезмәте хәбәр итә.
Республика башлыгы предприятиенең Бөек Ватан сугышы елларында һәлак булган хезмәткәрләре истәлегенә куелган мемориалга чәчәкләр салды.
Сугыш чорында заводның 2 меңнән артык хезмәткәре фронтка киткән, аларның күбесе кире әйләнеп кайтмаган. Заводның сигез хезмәткәре Советлар Союзы Герое исеменә лаек булган.
Бөек Ватан сугышы елларында Казан дары заводы фронтка дары җибәрүче төп предприятиеләрнең берсе булган. Предприятие базасында Махсус техник бюрода (ОТБ-40 НКВД) БМ-13 «Катюша» җайланмасы реактив снарядлары өчен дары уйлап табылган. Сугыш елларында завод фронтка артиллерия, авиация кораллары һәм винтовка патроннары өчен барлыгы 4 миллиардтан артык, шул исәптән «Катюша»лар өчен якынча 1 миллион заряд җибәргән.
1985 елда предприятие I дәрәҗә Ватан сугышы ордены белән бүләкләнгән.
