Татарстан Рәисе Рөстәм Миңнеханов республикада Идел буе федераль округының иҗтимагый проектларын гамәлгә ашыру белән шөгыльләнүче ведомствоара эш төркеме составын үзгәртү турында боерыкка кул куйды. Документ хокукый мәгълүмат порталында бастырып чыгарылган.
Эшче төркем округ проектлары чараларын әзерләгәндә һәм уздырганда башкарма хакимият һәм җирле үзидарә органнары эшен координацияли.
Татарстанда даими нигездә Идел буе федераль округының 14 иҗтимагый проекты гамәлгә ашырыла. Алар алты юнәлешне үз эченә ала.
Мәдәни-иҗади юнәлешкә «Театраль Идел буе» балалар һәм яшьләр театр коллективлары фестивале һәм «ФормART» стрит-арт фестивале керә.
Социаль юнәлеш «Балачакны кайтару» балалар иҗаты фестивале һәм «Менталь сәламәтлек» проекты белән тәкъдим ителә.
Интеллектуаль юнәлештә «иВолга» округ яшьләр форумы һәм Интеллектуаль олимпиада гамәлгә ашырыла.
Спорт юнәлешенә «Туриада» спорт-туристик лагере, 3×3 баскетбол турниры һәм Балалар-яшүсмерләр хоккеена ярдәм проекты керә.
Хәрби-патриотик юнәлеш «Ватан Геройлары», «Беркем дә онытылмаган» һәм «Гвардеец» проектларын үз эченә ала. Беренчесе Ватанны саклаучылар истәлеген саклауга, икенчесе – эзләү отрядлары слетына, өченчесе – яшь армия хәрби-патриотик җыеннарына багышлана.
Эшләүче яшьләр өчен «МолоТ» проекты гамәлгә ашырыла. Аерым юнәлеш Идел буе федераль округында кадетлар белеменә ярдәм итү белән бәйле.
Барлык проектлар да Россия Президентының Идел буе федераль округындагы Тулы вәкаләтле вәкиле Игорь Комаров патронажы астында уза. Алар балалар һәм яшьләрне үстерүгә һәм аларга ярдәм итүгә, шулай ук иҗтимагый кыйммәтләрне ныгытуга юнәлдерелгән.
