2026 елның җәй фасылын озаттык. Соңгы елларда елның бу җылы айлары аеруча эчтәлекле уза. Республикабызда үткән елда тормышка ашырыла башлаган “Татарстанда — җәй” проекты күптөрле массакүләм мәдәни, спорт чаралар оештыру өчен яңа мөмкинлекләр тудырды.
Җәйге сезон башланганнан бирле «Татарстанда җәй» проектының 4 555 чарасы узды, аларда 7 миллионнан артык кеше булды. Проект сайтына 1 миллионнан артык кеше кергән. «Татарстанда җәй» проекты 2025 елның 1 июнендә Татарстан Республикасы Рәисе Рөстәм Миңнеханов инициативасы белән старт алды. Проектның кураторы булып Татарстан Республикасы шәһәрләрен үстерү институты тора.
«Татарстанда җәй» республиканың барлык 45 муниципалитетының вакыйгалар программасын берләштерде — Казандагы эре фестивальләрдән алып ишегалларында һәм җәмәгать урыннарында локаль чараларга кадәр. Платформада музыкаль фестивальләр, экология турында лекцияләр, китап клублары, спорт ярышлары, балалар мастер-класслары һәм башка вакыйгаларны табарга мөмкин.
Проектның миссиясе – Татарстанда ял итүне популярлаштыру, эчке туризмны үстерү һәм җәмәгать урыннарын активлаштыру. Беренче ел эчендә проект җәйге сезон кысаларыннан чыкты һәм кыш көне эшен дәвам итте. Сентябрьдә дә Татарстан шәһәрләрендә һәм районнарында зур фестивальләр, спорт, гаилә һәм мәдәни чаралар дәвам итә.
